Nen robotgebruker of geweune bot is e computerprogramma da zelve, (semi-)automatisch, bewerkiengn uutvoert ip Wikipedia. Ne bot wordt bestuurd deur e geweune menschelikke gebruker (den eignoare) die em zegt wa dat 'n moe doene. Ze wordn surtout gebruukt vo repititieve werkskes lijk 't verbetern van spelfoutn, 't toevoegn van categorieën of 't anpassn van kapotte links.
Deur bots een officiële botstatus te geevn, wordn nunder massale bewerkiengn verborgen ip de lyste van recente veranderiengn. Zo bluuft de wiki overzichtelik vo de geweune menschn, moar kunn'n de bots toch nunder werk doen.
Om ier e bot te meugn droaien, moe je je an de volgende regels oudn (gebaseerd ip 't globaal botbeleid van Wikimedia):
- Aparte account: E bot moe droaien ip een aparte account, en 't woord "Bot" moe in de noame stoan (bv. JanBot).
- Gebrukerspagina: Ip de gebrukerspagina van de bot moe dudelik stoan wie den eignoare is en wa de bot zjuuste doet.
- Gin controversiële bewerkiengn: Bots meugen gin massale anpassiengn doen woar da discussie over ku bestoan, zounder da 't êest overlegd is met de gemêenschap.
- Snelied: Bots zounder botstatus meugen maximoal 1 bewerkienge per minute doen. Bots mét botstatus meugen rapper goan, moar meugen de servers noois overbelastn.
- Verantwoordelikied: Den eignoare is OSSAN verantwoordelik vo wa zyn bot uutspookt. As e bot de wiki upfokt of foutn makt, wordt ie direct geblokkeerd.
In 't verleen is gebleekn da 't massoal en automatisch anmoakn van nieuwe artikels (bv. over olle gemêentn in e bepoald land) vo vele upfok kan zurgn. As je e bot wilt gebruukn om massoal artikels t'importeern of an te moakn, moe je dit êest dudelik meldn en bespreekn in de Café.
Je moe zelve gin informaticus zyn om e bot te droaien. Der bestoan teegnwoordig programma's en tools da je ku gebruukn:
- AutoWikiBrowser (AWB): E programma da je ku downloadn om stief zêre (semi-)automatisch anpassiengn te doen.
- Pywikibot: E bibliotheek in Python die vele gebruukt wordt vo 't zwoardere bot-werk.
Der zyn twêe maniern om een officiële botstatus te krygn:
- Globale bots: Deze wiki lat globale bots toe. Da zyn bots die al ip vele andere wiki's actief zyn en nunder status via de Stewards ip Meta-Wiki gekreegn èn.
- Lokale bots: As je e nieuwe bot èt specifiek vo de VLS wiki, moe je de botstatus anvroagn in de Café. As der achter e poar doagn gin bezwoar is van d'andere gebrukers, kan e lokale Burocraat (of e Steward) de botstatus toekenn'n.
Innoame botstatus: De botstatus kan were ofgepakt wordn (door e Burocraat of Steward) as: den eignoare 't zelve vroagt, de bot de regels brikt, of as de bot ol joarenlangn nimeer actief is gewist ip de wiki.
Nevest de geweune bots zyn der ouk systeembots die angetuurd wordn deur de MediaWiki-software zelve (lik de MediaWiki message delivery). Die zurgn datter achter de schermn olles bluuft droaien. Oa je doa probleemn mee èt, moe je nie ip de VLS wiki zyn, moa moet er e bugreport by Wikimedia ingediend wordn.
Druk ip de knoppe ierounder vo de live, automatisch bygewerkte lyste van aal actieve bots ip deze wiki te bekykn.